11 qershor 2019
Brenda objektit të hotelit “Grand” ndodhet një prej hapësirave ku janë kryer dhunime gjatë luftës në Kosovë.
Dy dekada pas çlirimit, në këtë vend janë ekspozuar dëshmi për tmerret e asaj kohe.
Hapësira sjell copëza rrëfimesh të ndarë në dy pjesë: njëra që flet për rrugëtimin e Vasfije Krasniqi-Goodmanit, si zëri i parë i të mbijetuarve të dhunimit seksual që përjetimin e ka shprehur publikisht, raporton “Express” i KTV-së. Hapësira tjetër sjell copëza rrëfimesh të grave të tjera të dhunuara në Kosovë.
Ekspozita me të cilën u hap festivali “FemArt” është realizuar në bashkëpunim me Qendrën Kosovare për Rehabilitimin e të Mbijetuarve të Torturës.
Ekspozita “Bëhu Fytyra Ime” vjen në formën e një ekspozite interaktive duke u përballur me historinë e të mbijetuarave të dhunës seksuale, pikërisht në vendin ku kanë ndodhur krimet.
Pas ekspozitës, vazhdoi performanca artistike “Pas asaj”, që bëri bashkë artistet Agnes Nokshiqin dhe Mjellma Gorancin.
Mllefin e mbledhur me vite të tëra, artistja e nxjerrë përmes performancës dhe thotë se arti është mënyra e duhur t’i shtjellojë këto tema.
Artistja Mjellma Goranci, thotë se është hera e dytë që prezanton artin e saj përmes “FemArtit”.
“FemArt” sivjet do të realizohet rreth motos “Me liri kundër marres” dhe do të zgjasë deri më 16 qershor.
https://www.koha.net/kulture/168142/hapet-edicioni-i-7-te-i-femart-festival-me-ekspoziten-behu-fytyra-ime/?fbclid=IwAR2kdv2g2mEhYcqAW4BPJOQjD5JbqST9ej5VJ8Qc9MXcOkhFQE9N1gvyAnA