Ne nuk jemi ishull
Festivali i parë Rajonal Feminist në Kosovë u organizua për 4 ditë. Edhe pse filloi si një festival i vogël, ai e arriti misionin e tij duke krijuar një hapësirë mikpritëse për gratë artiste që të prezantojnë artin e tyre, të frymëzuar nga tema shoqërore dhe dëshira për respektimin e të drejtave të tyre. Gjithashtu, festivali ofroi një atmosferë argëtuese dhe dinamike për vizitorët, duke u mundësuar atyre të mësojnë mbi çështjet shoqërore me të cilat përballen gratë në Kosovë, dhe në veçanti gratë artiste në rajon.
Motoja e vitit 2013 ishte “Ne nuk jemi ishull”, me synimin për të nxitur diskutime dhe për të tërhequr vëmendjen ndaj çështjeve që lidhen me feminizmin në Kosovë, si dhe për të shërbyer si thirrje për më shumë bashkëpunim mes grave të Kosovës dhe atyre nga rajoni, si aktore të rëndësishme në ndërtimin e paqes dhe forcimin e bashkëpunimit.
Përmbajtja e programit Femart 2013: 4 shfaqje teatrore, 2 ekspozita fotografish, 12 filma të shkurtër dhe dokumentarë, 2 koncerte, 1 natë me poezi, 1 promovim i librit, prezantime mbi drejtësinë tranzicionale, prezantime dhe diskutime mbi feminizmin në rajon dhe festivale të ngjashme në rajon, etj.
Teatri Oda në Prishtinë, ishte nikoqir i edicionit të parë të festivalit FemArt.
Gjatë katër ditëve të festivalit ishin mbi 60 artistë dhe aktivistë (gra dhe burra) nga Kosova, Shqipëria, Suedia, Serbia, Maqedonia, Bosnja dhe Hercegovina, të cilët u përfshinë përmes aktiviteteve dhe projekteve të tyre.
Festivalin e vizituan rreth: 2000 njerëz
